Boko Xaram liderı öçen - 7 million dollar
AQŞ terrorçılar atamanı öçen aqçalata büläk birergä äzer
1372205
AQŞ Nigeriyä häm kürşe däwlätlärne qanğa buyağan terrorçı oyışması Boko Xaramnıñ liderı Abubäker Şekaunıñ urının söyläwçegä 7 million dollar birergä ışandıra.
Bu xaqta Amerikanıñ yustiśiyä ministrlığı Twitter aşa belderde. Aqçalata büläkne tışqı êşlär ministrlığı biräçäk.
Şekau oyışmanı tözegän Möxämmät Yosıf 2010nçı yılda üterelgännän soñ liderlıqqa kereşä. Ul tınıç häm xärbi ob’yektlarğa höcümnär oyıştırudan tış, 2014nçe yılda Borno töbägendä Çilbok qızların urlawda cawaplı totıla.
Boko Xaram Nigeriyädä üzeneñ barlığın 2000nçe yıllarnıñ başında kürsätä. 2009nçe yıldan başlap isä anıñ massaküläm dähşät çaralarında 20 meñnän artıq keşe ülä. Oyışma 2015nçe yıldan birle çik buyı kürşeläre Kamerun, Çad häm Nigerda da höcümnär yasıy.
