İtaliyädä koronavirus tarala

İldä 2 töbäkkä kerü-çığularnı çiklädelär

1364548
İtaliyädä koronavirus tarala

İtaliyädä koronavirustan ülüçelär sanı 2 buldı. Lombardiyä töbägendä älege çirne yoqtırğan xatın-qıznıñ da ğomere özelde.

İtaliyä grajdanlı saqlanu direktorı Angelo Borrelli matbuğat cıyılışında Kovid-19 virusınıñ ildä barlığı 79 keşedä raslanuın, alarnıñ 2seneñ ülüen söyläde. Rimda xastaxanädä yatuçı 1 keşe terelep çıqqan, 76sı älegä däwalana. Alarnıñ 18e reanimaśiyädä yata.  

Koronavirus yoqtıru oçraqlarınıñ kübese Lombardiyä töbägendä, anda ul 54 keşedä terkälgän. Veneto töbägendä isä 17 awıruçı bar.

Xökümät räise Djuzeppe Konti ministrlar kabinetın aşığıç räweştä cıydı. Awıru oçraqları küp bulğan Lombardiyä häm Veneto töbäklärenä kerü-çığularnı çikläw qararı birelde. Êş, belem birü häm däwlät çaraları waqıtlıça tuqtatıldı. Konti äytüençä, bu töbäklärdä qağıydälärne bozuçılarğa qarata cäza sankśiyäläre qarala.

İtaliyä xökümäte räise fikerençä, xäzerge waqıtta Awrupa Berlege illäre arasında irekle gizüne täêmin itüçe Şengen kileşüen tuqtatu kiräkmi.

Süz uñayınnan, Milan mêrı Djuzeppe Sala İtaliyä berençe futbol ligasının 25nçe atnasında uynalırğa tiyeşle İnter-Sampdoria oçraşuınıñ, koronavirusqa qarşı çaralar qısalarında, kiçekterelüen belderde.



Bäyläneşle xäbärlär