Guterreş İdlibtä qırıslıq häm utnı tuqtatırğa çaqırdı

Berläşkän Millätlär Oyışması ğomum särqätibe Antonio Guterreş Süriyäneñ İdlib töbägendäge qotoçqıç qurqınıçnı häm qırıslıqnı tuqtatırğa utnı tuqtatu iğ’lan itärgä çaqırdı.

Ul bu xaqta BMO ğomum üzägendä jurnalistlarğa yasağan belderüendä citkerde.

Ğomum särqätip Süriyäneñ tön’yaq-könbatışında bäreleşlär arqasında yaqınça 900 meñ keşeneñ yäşägän cirlären taşlap kitüen, biredä balalarnıñ salqınnan ülüen häm xalıqara keşelek xoquqınıñ sistemalı räweştä bozıluın assızıqladı.

Guterreş älege töbäktä yaqınça 2 million 800 meñ keşeneñ humanitar yärdämgä moxtac buluın ,soñğı 6 ayda yäşägän cirlärennän kitkän keşelärneñ ixtıycların qanäğät’länderü öçen 500 million dollar kiräklegen belderep yärdämgä çaqırdı.

Berläşkän Millätlär Oyışması ğomum särqätibe Antonio Guterreş:”Süriyä xökümäte Rusiya yaqlaw kürsätkän hawa höcümnäre belän yaqınça 1 yıl cir östenän höcümnären däwam itterä. Bu ayda Törkiyä häm Süriyä köçläre arasındağı bäreleşlärdä ülem oçraqları da buldı. Bolar könnän kön tağın da naçaraya baruçı keşelek draması belän bergä näticälären farazlaw qıyın bulğan bik citdi risklar da tudıra”,-dide.