Karantindağı köymädä awıruçılar arta

Yaponiyädä yaña tör koronavirus kizüe säbäple karantinğa quyılğan yulçı köymäsendä tağın 44 keşedä çir terkälde. Şulay itep, anda awıruçılar sanı 218gä citte. Korabta barlığı 3 meñ 700 tiräse yulçı bar ide. Anı 4nçe fevral’dä gonkonglı beräwdä virus açıqlanğannan soñ Yokogama portında karantinğa quydılar.

Koronavirus diagnozı quyılğan yulçılarnı xastaxanälärgä alıp kitälär. Karantinnıñ 19nçı fevral’gä qadär däwam itüe kötelä. Ämma köymädäge yulçılarnıñ barısına da analiz yasağannan soñ, virus tabılmağan häm xronik çirläre bulğan ölkän yäş’täge keşelärne tağın da irtäräk tışqa çığarırğa uylıylar. Ämma alar karantin waqıtı betkängä qadär bilgele ob’yektlarda qalırğa tiyeş.