AQŞqa rizasızlıq belderülär tuqtamıy

Dön'ya Tramp planınıñ tınıçlıq kitermäyäçägen söyli.

1350078
AQŞqa rizasızlıq belderülär tuqtamıy

AQŞ ilbaşı Donal’d Trampnıñ aldağı könne İzrail xökümäte räise Binyamin Netan’yaxu belän Aq Yortta iğ’lan itkän ber taraflı tınıçlıq planına qarata reakśiyälär özelmi.

Awrupa Berlege häm BMOdan soñ İran, Kuveyt, Tunis, Aljir, Livan häm Şveśiyädän Fälästingä teläktäşlek, Trampnıñ planına rizasızlıq belderüläre yasaldı.

Sionizmğa qarşı pravoslav yähüdlär planğa tiskäre qaraşta, izraillelär anıñ tınıçlıq kiteräçägenä ışanmıy.

İran ilbaşı Xäsän Ruxani AQŞ kiterep terägän kileşüne “yözyıllıqnıñ iñ äxlaqsız planı” bularaq bäyäläde. Ul anıñ Fälästin xalqı häm möselmannar üzañı belän uñışsızlıqqa oçrayaçağın belderde.

Fälästinne bülgäläw planına qarşı tağın ber belderü Tunistan yasaldı. İl parlamentı tınıçlıq planın tänqıyt’läde häm anı rasaçıl dip atadı.

Tunis tışqı êşlär ministrlığı isä: “Yaqın Könçığışta tınıçlıq Fälästin xalqınıñ xaqların tanudan başlanır,”- dip citkerde.

Aljir idaräse isä Fälästingä teläktäşlegen belderep, anıñ xalqınıñ başqalası Könçığış Qudüs bulğan bäysez däwläten tözü xoquqınıñ waqıt belän çiklänmägän xaq buluın assızıqladı.

Kuveyt tışqı êşläre ministrlığı da planğa rizasızlıq belderde häm Fälästin mäs’äläse öçen ğadel çişeleşneñ barı tik xalıqara qanunlı qararlar belän täêmin iteläçägen äytte.          

AQŞta sionizmğa qarşı pravoslav yähüdlär dä Trampnıñ planına qarşı çıqtı. Törkemneñ aldınğı liderları Vaşingtonda urtaq belderü yasadı.

AQŞqa Şveśiyädän dä iğ’tibar cälep itüçe reakśiyä yasaldı. Tışqı êşlär ministrı Ann Linde Könbatış Yordannıñ İzrail tarafınnan bötenläy annekśiyälänüeneñ xalıqara xoquqqa qarşı buluın assızıqladı. Lindeğa aktivistlar da teläktäşlek kürsätte.

AQŞnıñ “Yöz’yıllıq kileşüe”nä izraillelär dä ışanmadı. Angliyä şirkäte uzdırğan soraştıruğa qarağanda, alarnıñ 61%ı plannıñ tınıçlıq kitermäyäçägen äytkän.



Bäyläneşle xäbärlär