Oçqıç yağulığın mäktäp östenä buşatqan

AQŞta aşığıç töşep utırırğa xäzerlängän oçqıç yağulığın mäktäplär bulğan cirlek östenä buşata. Anda kimendä 60 keşeneñ bu xäldän zarar kürüen belderälär.

BBCneñ xäbärenä qarağanda, Delta hawa yulları şirkäteneñ yulçı oçqıçı motorındağı xilaflıq säbäple äle yaña ğına kütärelep kitkän Los-Andjeles xalıqara aêroportına aşığıç räweştä kire töşep utıra. Bu waqıtta cirgä qatı itep kilep bärelmäs öçen yökne azaltırğa kiräk. Ä yaña ğına kütärelgän oçqıçnıñ yağulığı küp bula. Şuna kürä, oçqıç anı yaqındağı bistä östenä buşata. Cirlektäge 6 mäktäptä uquçı balalarnı da kertep 60 keşedä sulış aluda qıyınlıqlar häm tire bozılular barlıqqa kilgän. Aêroportqa 26 çaqrım yıraqlıqta urnaşqan Park başlangıç mäktäbeneñ ike sıynıfı bu waqıtta uramda bulğan.  

Delta hawa yulları şirkäte oçqıçnın imin räweştä töşep utıru awırlığına ireşü öçen yağulığın buşatırğa tiyeşlegen belderde.

Ämma şunısı da bar, aviaśyä qağıydäläre buyınça, oçqıçlar aşığıç töşep utıru öçen barı tik bilgele urınnar östendä yäisä zur yuğarılıqta yağulıqların buşata ala.