"Ukraina oçqıçınıñ raketa belän bärep töşerelüen belmi idek"
İran citäkçelege qazanıñ neçkälekläre xaqında üzlärenä belderelmäwen alğa sörä
Ukraina hawa yulları oçqıçınıñ İran saqlanu sisteması tarafınnan bärep töşerelüe turında mäğ’lümat ilbaşı Xäsän Ruxani häm xökümät äğ’zalarınnan yäşerelgän. İran xökümäte süzçese Ali Rebii şulay dip belderde.
İlneñ däwlät telekanalına qarağanda, Rebii başqala Tähranda oyıştırılğan matbuğat cıyılışında bolay digän: “Bez yalğan söyläw häm waqıyğanı yäşerüdä ğayepländek. Çınlıqta wäzğıyät’ alay tügel ide. Bez yalğan söylämädek, bezgä älege mäs’älä belän bäyle mäğ’lümat birelmäde”. Anıñ äytüençä, ilbaşı Ruxaninı da kertep xökümät äğ’zalarına oçqıçnıñ hawa saqlanu sisteması tarafınnan yalğış bärep töşerelüe turında comğa könne töştän soñ beldergännär.
“Ruxani bu xäbärne aluğa Milli qurqınıçsızlıq yuğarı şurasın cıyılışqa çaqırdı häm mäs’älä belän bäyle belderü yasadı,”-di Rebii. Anıñ äytüençä, ilneñ inqıylab gvardiyäse hawa köçläre komandirı Ämir Ali Xacızadä xäl turında çärşämbe könne ük xäbärdar bulğan häm citäkçelegenä beldergän. Alar isä mäs’äläne tikşerergä kiräklegen uylağan. Rebii yalğışlıq turında xökümätkä 2 könnän soñ belderüdä naçar niyät bulmawın alğa sörä. “Sonğa qalıp belderüdän bez dä qanäğat’sez. Problema oyışmalar arasındağı strukturalı êlemtä citeşsezlegennän kilep çıqtı,”-di süzçe.
Bilgele bulğança, 8nçe ğıynvarda Ukraina başqalası Kiyevqa quzğalğan oçqıç Tähran xalıqara aêroportınnan kütärelep beraz waqıt ütügä kilep töşte. Andağı 176 keşeneñ barısı da ülde.
Tähran idaräse başqa oçqıçnıñ İran armiyäse tarafınnan bärep töşerelüe turındağı farazlarnı kire qaqtı. Ämma 3 kön ütkäç ğomumştab idaräse yulçı oçqıçına yalğış raketa cibärülären tanıdı.