Qudüs köçenä 200 million yevro
Üterelgän general Söläymani citäklägän xärbi oyışmağa östämä aqça bülende
İran mäclese ilneñ inqıylab gvardiyäsenä bäyle Qudüs köçe xärbi berlekläreneñ byudjetın 200 million yevroğa arttırdı.
Mäğ’lümat agentlığı İSNAnıñ xäbärenä qarağanda, parlament räise Ali Laridjani bu xaqta açıq utırışta yasağan çığışında äytä.
“Regiondağı qarşılıq kürsätüneñ cawaplılığın üz östenä alğan Qudüs köçenä teläktäşlek maqsatı belän ağımdağı yılnıñ sonğı 2 ayı öçen (İrandağı kalendar’ buyınça yıl axırı 20nçe mart) Milli üseş fondınnan 200 million yevro bülende,”-dide spiker.
Laridjani qararnıñ İran liderı Ayätullax Ali Xamaneynıñ kürsätmäse belän çığarıluın citkerä.
Qudüs köçe İran armiyäseneñ il tışındağı xärbi küzläw operaśiyälären alıp bara. Ul regiondağı iñ köçle küzläw oyışmalarınnan berse bularaq bilgele. Qudüs köçe turıdan-turı İran liderı Xamaneyğa bäyle. Oyışma komandirı, general Qasıym Söläymani üterelgännän soñ ul bolay dide: “Anıñ kitüe belän êşe tuqtalıp qalmayaçaq häm yulı yabılmayaçaq”.
