Putinnıñ serle çemodanı

Rusiyä däwlät başlığı Vladimir Putinnıñ atom-töş raketası oçırtu töymäse bulğan çemodanı täwge tapqır televideniye kanalında kürende. Berniçä Sovet liderı qullanğan, Rusiyäneñ täwge ilbaşı Boris Yel’śinnan soñ Putinğa küçkän serle diplomatnı härkem kürä aldı. Zvezda TV kanalındağı ber programmada xärbi belgeç Aleksey Yegorov anıñ turında mäğ’lümat birde.

Programmada çemodannıñ tarixı da telgä alındı. Xärbi belgeç diplomatnıñ Sovetlar Berlege zamanında “Kazbek” dip yörtelüen äytä. Anıñ maqsatı - xärbi komandalıq üzägenä kodlar cibärep bulaçaq suğışnı başlatu täğ’limatı birü.

Diplomat Putinnıñ däwlät başlığı bulıp saylanuınnan soñ yañartıla. Xärbi belgeç äytüençä, çemodan yärdämendä aldan tözelgän suğış täğ’limatı kodları strategik qorallarnıñ komandalıq üzägenä cibärelä häm atom-töş oçlı balistik raketalar älege komanda belän xäräkätkä kilä ala.       

Tapşıruda äytelgänçä, atom-töş suğışı täğ’limatı birüçe çemodannan tış tağın 2 diplomat bar. Alar da komp’yuter êlemtäse yärdämendä turıdan-turı komanda üzäkläre belän bäyläneşkä kerä.

Rusiyä däwlät başlığı Vladimir Putin älege çemodannı här çit ilgä säyäxätenä diyärlek häm ilneñ yıraq noqtalarındağı cıyılışlarğa barğanda yanında yörtä. Anı totıp yörüçe keşe isä älege çemodan buyınça xärbi belgeç. Çemodannıñ 2 ähämiyätle töymäse bar. Alarnıñ aq töstägesenä basqanda - maxsus kodlar strategik raketa märkäzlärenä cibärelä häm turıdan-turı täğ’limat tormışqa aşırıla.