Franśiyädä êş taşlawlar

Franśiyädä ilbaşı Êmmanuêl Makron idaräseneñ pensiyä reformasına rizasızlıq yözennän küp kenä tarmaq bilgesez waqıtqa qadär êş taşladı. Näticädä, il külämendä tormış tuqtap qalğan şikelle buldı.

Êş taşlaw çarasında qatnaşuçılar arasında Parij häm anıñ tiräsendä xezmät kürsätüçe transportçılar, ilneñ timer yullar şirkäte häm aviakompaniyä Êyr Frans xezmätkärläre, tabıblar, uqıtuçılar, tärtip saqçıları, advokatlar, awıl xucalığı xezmätkärläre, taksistlar häm başqa bik küp tarmaqta êşläwçelär bar. Alarnıñ rizasızlıq belderüenä säbäpçe bulğan reforma layıqlı yalğa çıqqanda däwlät xezmätkäre häm êşçe arasındağı ayırmanı beterü, pensiyä yäşen 62dän 64kä citkerüne küzdä tota.  

Êş taşlaw qısalarında bügen il külämendä uqu yortlarınıñ 65%ında yal iğ’lan itelde.

Parijda 16 metro çeltäreneñ 11e xezmät kürsätmi, tağın 5sendä citdi xilaflıqlar bar.

Şähär yanı poyezdları häm avtobuslarda da kiçegülär bulğalıy.

Yuğarı tizlekle poyezd säfärläreneñ 90%ı, başqa poyezd säfärläreneñ isä 97%ı başqarılmıy.

Monnan tış, Êyr Fransneñ ildäge oçışlarınıñ 30%ı ğamäldän çığarıldı.

Rizasızlıq çarasında qatnaşuçılar Makron idaräseneñ pensiyä reformasınnan baş tartuın taläp itä.

Demonstraśiyä häm êş taşlawlar ilneñ iñ zur hönäri berlege Ğomum êşçe konfederaśiyäse häm başqa bik küp hönäri berleklärdän tış, “sarı jiletlı”lar tarafınnan da yärdäm ala.

Süz uñayınnan, Makron êş taşlaw häm demonstraśiyälär kiterep çığaraçaq mäs’älälärne çişügä waqıt ayıru öçen çit ilgä säyäxätlärennän baş tartıp tora.