Urta diñgezdä faciğa bulmıy qaldı

İtaliyäneñ Lampedusa utrawı sulıqlarında äylänep qaplanğan köymädäge 143 qaçaqnı yar buyı iminlege xezmäte qotqardı. Alarğa qaza turında ber ital’yan xäbär itä. Ul utrawğa 2 çaqrım tiräse yıraqlıqta 10 metr ozınlıqtağı köymäneñ awır xäldä buluın söyli. Şunnan soñ qotqaru operaśiyäse başlana.

İtaliyä yar buyı iminlege komandalığı beldergänçä, naçar hawa torışı häm awır diñgez şartlarına qaramastan, 143 qaçaqnı qotqardılar, ülem-kitem yuq.

İtaliyä matbuğatındağı xäbärlärdä isä, qaçaqlarnın süzenä tayanıp, 20 keşeneñ yuqqa çığuı turında yazalar.

Monnan tış, ışanıçlı port çaqıruına İtaliyädän cawap kilmägän öçen Franśiyä ictimağıy oyışmaları, Çik tanımayçı tabiblar oyışması häm “SOS Urta diñgez”neñ köymäse su êçendä kötü xälendä ide. “Oyşen Viking” dip ataluçı älege köymägä, nihayät’, yarğa yaqınlaşu röxsäte birelde. Ul 213 qaçaq belän bergä İtaliyäneñ Messina portına keräçäk.

Şul uq waqıtta, İspaniyäneñ “Open Arms” ictimağıy oyışması, Twitterdan belderü yasap, ışanıçlı port çaqırularına äle xaman cawap almayların citkerde. Alar üzläre qotqarğan 73 qaçaq belän açıq diñgezdä 4 metr biyeklektäge dulqınnar belän köräşergä mäcbür buluların söyli.