İzraildä xökümät tözi almadılar

İzraildä xökümät räise Bin’yamin Netan’yaxudan soñ Zäñgär-Aq ittifağı liderı Benni Ganś ta xökümät tözerlek küpçelekne täêmin itä almadı. Bu xaqta ul üzenä birelgän waqıt tularğa berniçä säğat’ qalğaç ilbaşı Reuven Rivlingä belderde.

Monnan soñ İzrail däwläte başlığı parlamenttağı deputatlardan 21 kön êçendä xökümät tözerlek namzät tabuların taläp itäçäk. Ägär ber xalıq ışanıçlısı da 3 atna êçendä koaliśiyä qorırlıq küpçelekkä ireşä almasa, ildä qabat irtä saylaw ütkäreläçäk.  

Parlamenttağı ike köçle partiyä liderları Netan’yaxu häm Ganśnıñ berlek xökümäte mäs’äläsendä kileşä almawı - ildä irtä saylawlar ixtimalınıñ tağın da kübräk kön üzägenä kilüenä säbäpçe buldı.

İzraildä 17nçe sentyabr’dä uzğan saylawlarda Ganś liderlığındağı Zäñgär-Aq ittifağı ciñde. Ul 120 urınlı parlamentqa 33 xalıq ışanıçlısı cibärde. Netan’yaxunıñ Likud partiyäse isä annan az ğına qalışıp parlamentta 32 urın aldı.    

 İzrail watandaşı bulğan fälästinlelärne wäkillek itüçe firqalärdän oyışqan Urtaq ğaräp isemlege blogı saylawda öçençe buldı häm  parlamentqa 13 xalıq ışanıçlısı cibärde.

İlbaşı Reuven Rivlin koaliśiyä xökümäte tözü wazıyfasın başta uñ partiyälärneñ teläktäşlegen aluçı Netan’yaxuğa yöklägän ide. Ämma ul citärlek küpçelek sanaluçı 61 xalıq ışanıçlısınıñ tawışın cıya almadı.

Şunnan soñ Rivlin 23nçe oktyabr’dä koaliśiyä tözü êşen Ganśqa birgän ide.