Burkina-Fasoda şaxtaçılarğa höcüm

Terrorçılar alarğa yulda höcüm itä häm 37sen üterä

Burkina-Fasoda şaxtaçılarğa höcüm

Burkina-Fasonıñ könçığışında şaxta şirkäteneñ maşina konvoyına höcüm oyıştırıldı. Anda grajdanlı häm xärbi 37 keşeneñ ğomere özelde.

Konvoy Kanadada terkälgän SEMAFO şirkäteneñ altın şaxtası êşçelären yörtä torğan bula. Gurma häm Tapua şähärläre arasında aña höcüm itälär.

Konvoynıñ iñ başında baruçı maşina yulğa quyılğan minağa êlägep şartlıy. Şunnan soñ höcümçelär başqa texnikalarğa ata başlıy. 37 keşe ülä, kimendä 20se yaralana. Xäle awır bulğan yaralanuçılarnı başqala Uagadugudağı xastaxanälärgä iltälär, ciñelçä yaralanuçılar yaqındağı mediśina üzäklärendä yärdäm ala.

Konvoyda bulğan qayber keşelärdän äle xaman xäbär-xäter bulmawın äytälär.

Könçığış töbäge general-gubernatorı Saydu Tussen Prosper Sanu beldergänçä, iminlek köçläre cirlektä höcümçelärne häm yuğaluçılarnı êzli başlağan. Ul älege qırın ğamälne “varvarlarça häm qurqaqlarça” dip bäyäli.

Bırkina-Fasoda terrorçı oyışmalarnıñ höcümnärendä 4 yılda 600dän artıq keşeneñ ğomere özelgän.

Terrorçılıq aktları artu säbäple ilneñ berniçä töbägendä 2019nçı yılnıñ 1nçe ğıynvarınnan ğadättän tış xäl iğ’lan itelde. Ul Burkina - Fasodağı 13 töbäkneñ 7sendä äle xaman ğamäldä.



Bäyläneşle xäbärlär