Patşa ğailäse Paqıstanda
Prinś Uil’yam xatını Kêyt Middlton belän Paqıstannı gizäçäk
Angliyä täxeteneñ 2nçe nomerlı varisı Kêmbridj gerśogı prinś Uil’yam häm xatını gerśoginya Kêyt Middlton 5 könlek räsmi säfär belän Paqıstanğa kilde.
Yuğarı däräcäle qunaqlar Ravalpindi şähärendäge Nur Xan aviabazasına töşep utırdı. Alarnı Paqıstan tışqı êşläre ministrı Şax Maxmud Kureyşi qarşı aldı.
Kureyşi, aêroportta jurnalistlarğa belderü yasap, patşa ğailäse äğ’zaların dulqınlanıp kötülären söyläde. “Prinś Uil’yamnıñ änise prinśessa Diananıñ ilebezgä yasağan yärdäm çaraların häm, ayıruça, Paqıstan xökümät räise İmran Xan tarafınnan tözetterelgän ildäge berdänber yaman şeş tikşerü xastaxanäse öçen iğanä cıyuda qatnaşuın onıtmayaçaqbız,”-dide ul.
Kensington sarayınnan yasalğan belderüdä äytelgänçä, aqsöyäk par ildä meñ çaqrımnan artıq yul ütäçäk häm Paqıstan mädäniyäte belän yaqınnan tanışaçaq.
Prinś belän prinśessanıñ İslamabadta xökümät räise İmran Xan häm ilbaşı Arif Alvi belän oçraşuı, soñınnan Laxor, Śitral häm Gilgit-Baltistanğa baruı kötelä. Alar yäş’lär, êşmäkärlär häm êşquarlar belän äñgämälär ütkäräçäk.
2005nçe yılda Käşmirdä cir teträw bulğannan soñ Paqıstan täwge tapqır Böyekbritan patşa ğailäsen qunaq itä. Alar öçen kiñ külämle qurqınıçsızlıq çaraları kürelde. İslamabadta bik küp yullar ütep yörü öçen yabıldı. Şähärdä kesä telefonnarı êlemtäsendä dä özekleklär bulğalıy.
Kêmbridj gerśogı prinś Uil’yam häm xatını gerśoginya Kêyt Middlton bügen Universitet kampusındağı däwlät qızlar liśeyenda buldı.
