Liviyädä 35 rusnıñ üterelüe farazlana
Alar tüläwle ğaskärlärdä xezmät itkän
Liviyäneñ başqalası Tripoli tiräsendä uzğan ay bulğan hawa höcümendä ilneñ könçığışındağı köçlärneñ liderı Xalifä Xafterğa yärdäm itüçe 35 rus xärbiyeneñ ülüe turında süz çıqtı. Alarnıñ tüläwle ğaskär buluın belderälär.
Franśiyäneñ “Le Point” jurnalı sentyabr’ ayında ber hawadan bombalawda komandirları belän bergä 35 rus xärbiyeneñ üterelüen yazdı, ämma bu höcümne kem tormışqa aşıruı turında mäğ’lümat bulmadı. Basma yazğança, älege tüläwle ğaskärlär Rusiyä däwlät başlığı Vladimir Putinğa yaqın ber şäxes tözegän Vagner törkemenä bäyle.
Liviyä milli kileşü xökümäteneñ Burkan äl-Gadab operaśiyäseneñ 27nçe sentyabr’dä yasalğan belderüendä Xafter köçläre yağındağı 8 tüläwle xärbineñ üterelüe äytelde.
Liviyä êçke êşlär ministrı Fätxi Başaga isä 24nçe sentyabr’dä yasağan belderüendä Berläşkän Ğaräp Amirlekläreneñ Xaftergä rus şirkäte häm Sudandağı Cancavid suğışçılarınnan toruçı tüläwle ğaskärlär belän yärdäm itüen söyläde.