AQŞnıñ iñ xätär seriyäle üterüçese

Ul 90nan artıq keşene buıp üterüen tanıdı

1284794
AQŞnıñ iñ xätär seriyäle üterüçese

AQŞta 79 yäşendäge mäxküm Samuêl’ Littlnıñ 90nan artıq keşe üterüe açıqlandı. İlneñ matbuğat çaralarındağı xäbärlärgä qarağanda, Federal’ tikşerü byurosı FBR älege şäxesneñ 1970tän başlap 2005nçe yılğa qadär 93 keşene buıp üterüen söyläwennän soñ tikşerüne tiränäytte. Samuêl’ Littlnıñ qorbannarınıñ kübese qara tänle xatın-qız.

FBR mäxküm söylägän cinayät’lärneñ xäzergä qadär 50sen tikşerep,  döres buluın açıqlağan inde. Bolar - Florida, Arkanzas, Kentukki, Nevada häm Luiziana ştatlarında bulğan üterülär.  

Wäqalätlelär añlatuınça, Littl êlekkege boksçı bularaq ilne gizep yöri. Ul qorbannarın cämğıyät’tän çitläşkän narkomannar häm problemalı keşelär arasınnan saylıy. Kübeseneñ ülemen tikşerü çiktän tış doza qullanu, qaza digän näticä belän yäisä başqa säbäplär arqasında yabıluı açıqlandı.

Kaliforniyädäge ber törmädä 2012nçe yıldan birle utıruçı Littlnı berniçä ğomerlek räşätkä artına xökem ittelär. Anıñ üz ğayeben tanuınnan soñ FBR wäkilläre distälägän yıllar näticäsez yatkan cinayät’ êşlären qabat açıp qarıy başladı.

Samuêl’ Littlnı AQŞ tarixındağı iñ xätär seriyäle üterüçe dip atadılar. Annan alda bu isem belän 1970nçe yıllarda kimendä 33 bala häm yäşüsmerne ütergän Djon Uêyn Gêysi häm 1974nçe-1978nçe yıllarda 30 keşeneñ ğomeren özüen tanığan Ted Bandinı atıylar ide.  

Dön’ya külämendä isä 2000nçe yılda qulğa alınğan häm 250 keşeneñ üleme öçen cawaplı totıluçı ingliz tabib Garol’d Şipman iñ xätär seriyäle üterüçe bularaq bilgele.



Bäyläneşle xäbärlär