Tramp telefon çıbığınıñ ikençe oçında kötep torğan

İran ilbaşı Ruxani AQŞ liderı belän söyläşüdän baş tartqan

1280271
Tramp telefon çıbığınıñ ikençe oçında kötep torğan

İran ilbaşı Xäsän Ruxaninıñ BMO ğomum şurası cıyılışları waqıtında AQŞ ilbaşı Donal’d Tramp belän bulırğa tiyeşle telefon söyläşüennän baş tartuı farazlana. Bu xaqta “N’yu-York Tayms” gazetında urın alğan xäbärdä äytelä. Anda Franśiyä aradaşçılığı näticäsendä Tramp belän Ruxani arasında telefon êlemtäse urnaştırılırğa tiyeş buluı yazıla.

Êmmanuêl’ Makron N’yu-Yorkta Ruxani tuqtalğan qunaqxanägä kitä häm Tramp belän söyläşü täq’dimen İran delegaśiyäsenä citkerä. Bu xaqta Ruxanigä kiñäşçeläre belderä. Qunaqxanäneñ ışanıçlı ber bülmäsen tiz arada telefon söyläşüe öçen äzerlilär. Xäbärdä äytelgänçä, Tramp telefon çıbığınıñ ikençe oçında kötep torğanda Ruxani bülmäsennän dä çıqmağan.    

Belgeçlär fikerençä, İran ilbaşı älege söyläşüdän soñ üz ilendä bulaçaq reakśiyädän qurıqqan. Xalıqara krizis törkemendäge İran programması direktorı Ali Vaez da êçke säyäsi wäzğıyät’ arqasında Ruxaninıñ Tramp belän söyläşügä bara almayaçağın belderde. Anıñ süzenä qarağanda, İran ilbaşı sankśiyälär mäs’äläsendä uñışqa ireşä alacağın tögäl belmiçä torıp bu äñgämä tormışqa aşmayaçaq.   



Bäyläneşle xäbärlär