Bolton ni öçen quıldı?

AQŞ ilbaşı Donal’d Tramp İranğa sankśiyälärne azaytu turında fiker beldergännän soñ Aq Yort milli qurqınıçsızlıq kiñäşçese Djon Bolton moña kisken qarşı çıqqan häm şuna kürä wazıyfasınnan alınğan digän farazlar bar.  

Bloombergnıñ xäbärenä qarağanda, düşämbe könne oval bülmädä uzğan ber utırış waqıtında Tramp ay axırında N’yu-Yorkta oyıştırılaçaq BMO ğomum şurası qısalarında İran däwlät başlığı Xasan Ruxani belän oçraşunı garantiyäläw öçen sankśiyälärne yomşartırğa täq’dim itä.   

AQŞ finans ministrı Stiven Mnuçin şulay itep İran belän söyläşülärgä yul açılacağın belderep ilbaşına teläktäşlek kürsätä. Bolton isä moña kisken räweştä qarşı çığa.  

Şunnan soñ Tramp kiñaşçene êşennän çığarırğa qarar birä. Alar inde İran ğına tügel, Venesuêla mäs’äläsendä dä küptän urtaq fikergä kilä almıylar.

Qayber çığanaqlar beldergänçä, Aq Yort Tramp belän Ruxaninıñ BMO ğomum şurası utırışları waqıtında oçraşuları öçen xäzerlek başlağan inde. İrannıñ moña qarata nindi fikerdä buluı älegä bilgele tügel.

Süz uñayınnan, İzrail xökümäte räise Binyamin Netan’yaxu Boltonnıñ Aq Yorttan kitüe belän iñ tuğ’rı teläktäşläreneñ bersen yuğalttı.