Süriyä mäs'äläse Putin belän Merkel'nıñ kön üzägendä

Rusiyä däwlät başlığı Vladimir Putin Germaniyä kanślerı Angela Merkel’ belän Süriyä mäs’äläse xaqında söyläşte. Äñgämä telefon aşa ide.

Kreml’dän belderülärençä, söyläşüdä Süriyäneñ İdlib töbägendäge wäzğıyät’ urtağa quyıla. “Yaqlar Töp qanun komitetınıñ tiz arada qorıluınıñ ähämiyätle buluın assızıqladı,”-diyelä anda.

Söyläşüdä, şulay uq, Ukrainanıñ könçığışındağı krizisnıñ Minsk kileşüe qısalarında çişelüe kiräklegenä iğ’tibar cälep itelä. Yaqlar Normandiyä formatında êşçänlekneñ däwam itterelüe mäs’äläsendä dä kileşte.  

Rusiyä belän Germaniyä Liviyä krizisınıñ tınıç yullar belän çişelüen yaqlawların däwam itäçäk. Belderüdä äytelgänçä, söyläşüneñ tağın ber teması - İran atom-töş kileşüe. İke yaq ta kileşüneñ saqlanuın teli.