"Open Arms"tan tağın 13 qaçaqnı töşerdelär
Qotqarılğan qaçaqlar 15 könder diñgezdä cirdän qabul itelülren kötä
Urta diñgezdä qotqarılğan qaçaqlarnıñ 13e êvakuaśiyälände. Alarnı üz bortına alğan İspaniyä ictimağıy oyışması “Proactiva Open Arms”nıñ köymäse inde 15 kön İtaliyäneñ Lampedusa utrawı yanında portqa kerü röxsäte kötä.
Oyışmanıñ İtaliyädäge cawaplısı Rikardo Gatti beldergänçä, köymädä xäzerge waqıtta 134 migrant bar. Ul kiçäge kiçtän birle başta 9, annan tağın 4 keşeneñ yarğa çığarıluın söyli. İtaliyä êçke êşlär ministrlığı köymägä portqa kerergä häm qaçaqlarnıñ barısın cirgä töşerergä röxsät birmi.
Gatti äytüençä, bortta qalğan 134 keşeneñ 29ı - bala. Alarnıñ barı tik berse yanında ğına äti-änise bar.
“Open Arms”nıñ Twitter xisabınnan yasalğan belderüdä köymädä 2 atnadan artıq kötüçe qaçaqlarnıñ tiz arada êvakuaśiyälänergä tiyeşlege, keşelek qanunnarı buyınça monı êşlärgä kiräklege iskärtelä.
