Tramp Qıtayğa yärdäm itärgä teli

AQŞ ilbaşı Donal’d Tramp Qıtay däwläte başlığı Si Śzin’pingä möräcäğat’ itte. Ul Gonkong mäs’äläsen tiz häm keşelekle räweştä çişä aşuın belderde.

Trampnıñ Twitter xisabınnan urtaqlaşqan yazmasında mondıy yullar bar: “Qıtay, älbättä, kileşü tözergä teli, ämma başta Gonkongnı keşelekle räweştä xäl itsennär”.

Tramp Qıtay däwlät başlığın bik yaxşı tanuın söyli.

“Ul xalqı tarafınnan xörmät itelüçe böyek lider. Hiç şöbhäm yuq, ägär däwlät başlığı Si Gonkong problemasın tiz häm keşelekle räweştä çişergä teläsä - monı êşli alır. Älege mäs’älä xaqında söyläşü uzdırıyqmı?”-dip sorıy AQŞ ilbaşı.  

Qıtaynıñ Gonkong maxsus administrativ töbägendäge rizasızlıq çaraları dön’yanıñ kön üzägendä. Xalıq xökem itelgän yäisä ğayeplänüçe keşelärne Qıtay, Makao häm Tayvan’ğa tapşırunı ciñeläytüçe qanun proyektına qarşı çığa.

Dokument säyäsi mäxkümnärgä qağılmıy. Yaqınça 7 million yarım xalqı bulğan Gonkongta yäşäwçelärneñ kübese Qıtaynıñ xökem itü sisteması astında säbäpsez qulğa alular, ğadel bulmağan mäxkämä qararları häm, xätta, ğazaplawlarğa duçar bulaçağın uylıy.  

Qanun üz köçenä kergän oçraqta, Qıtaynıñ Gonkongtağı säyäsi oppoziśiyäne nişanğa alaçağınnan da qurqalar.