Gonkongta rizasızlar belän poliśiyä arasında bäreleş

Rizasızlıq çarası oyıştıruçılar aêroporttan çığudan baş tarta

1252472
Gonkongta rizasızlar belän poliśiyä arasında bäreleş

Gonkong maxsus administrativ töbägendäge ğayeplelärne Qıtayğa tapşıruına qarşı çığuçılar rizasızlıq akśiyälären däwam itä. Alar Gonkong aêroportın biläp aldı. Rizasızlar belän poliśiyä arasında bäreleş kilep çıqtı.  

Çarada qatnaşuçılar kiçä cirle waqıt belän säğat’ 16 tulıp 30 minuttan başlap oçışlarnıñ ğamäldän çığarıluına säbäpçe buldı. Alar aêroporttan kitärgä telämi. Poliśiyä rizasızlarnı küz yäşen çığaruçı gaz häm tayaqlar belän dä quıp qaradı.

Protestçılar tärtip saqçılarınıñ aêroportqa kerüen barrikadalar belän kirtälärgä mataştı. İke yaqtan da yaralanuçılar buldı.  

Gonkongnıñ baş idaräçese Kêrri Lam Çeñ Yuêt-ngor älege waqıyğalar xaqında belderü yasadı häm köç qullanunı tuqtatırğa çaqırdı. Ul Gonkongnıñ tärtiple, imin häm qanunnar buyınça yäşäwçe şähär buluın täêmin itüneñ cawaplılığın kütärüen äytte.

Gonkongta xökem itelgän yäisä ğayeplängän keşelärneñ Qıtayğa, Makao maxsus administrativ töbägenä häm Tayvan’ğa tapşırunı ciñelläşterüçe qanun proyektı 3nçe aprel’dä parlamentqa kertelde.

Dokument säyäsi mäxkümnärgä qağılmıy. Yaqınça 7 million yarım xalqı bulğan Gonkongta yäşäwçelärneñ kübese Qıtaynıñ xökem itü sisteması astında säbäpsez qulğa alular, ğadel bulmağan mäxkämä qararları häm, xätta, ğazaplawlarğa duçar bulaçağın uylıy.   

Qanun üz köçenä kergän oçraqta, Qıtaynıñ Gonkongtağı säyäsi oppoziśiyäne nişanğa alaçağınnan da qurqalar.  

Gonkongnıñ baş idaräçese Kêrri Lam 15nçe iyün’dä oyıştırılğan matbuğat cıyılışında proyektnıñ cämäğat’çelektä bik zur fiker qarşılıqlarına kiterüen, şul säbäple tuqtatılıp toruın äytkän ide.

Rizasızlar isä qanun proyektı räsmi bularaq ğamäldän çığarılğanğa qadär çaralarnı däwam itäçäklären belderde.    



Bäyläneşle xäbärlär