Boris Djonson - Angliyäneñ yaña xökümät räise

Angliyädä konservativ partiyä citäkçelegenä saylanğan Boris Djonson ilneñ yaña xökümät räise buldı.

Partiyä äğ’zaları arasında uzğan saylawda Djonson 92 meñ 153 tawışqa iyä buldı. Köndäşe - xäzerge tışqı êşlär ministrı Djeremi Xant isä 46 meñ 656.

Şulay itep, xakimiyättäge partiyäneñ liderlıq känäfiyenä utırğan Boris Djonson ber uq waqıtta Angliyäneñ yaña xökümät räise bulu xoquqı qazandı.

Djonson näticälär açıqlanğannan soñ çığış yasap: “Breksitnı tormışqa aşıru, ilne berläşterü, Djeremi Korbinnı ciñü waqıtı,”-dide. Süzen ul “Kampaniyä bette, xäzer êşläw zamanı” dip tögälläde.   

Xökümät räise Tereza Mêy irtägä patşabikä Yelizaveta İkençegä êştän kitü ğarizasın kertäçäk. Şunnan soñ Djonsonnıñ Bukingem Sarayına barıp yaña xökümätne tözü wazıyfasına kereşüe kötelä.