Marşall utrawlarında radiaśiyä däräcäse Çernobıl’dän artıq

AQŞ anda 67 sınaw ütkärgän

Marşall utrawlarında radiaśiyä däräcäse Çernobıl’dän artıq

AQŞnıñ Marşall utrawlarında radiaśiyä däräcäse Çernobıl’ häm Fukusimadan artığraq. Tın okeandağı älege cirlektä 1946nçı-1958nçe yıllarda Amerika atom-töş sınawları uzdırdı. Anda barlığı 67 şartlaw yasaluın belderälär.  

CNNdä urın alğan xäbärlärgä qarağanda, utrawlarda Kolumbiyä universitetı belgeçläre tikşerenülär ütkärgän. Andağı radiaśiyä atom-töş qazası bulğan urınnar - Çernobıl’ häm Fukusimadan meñ tapqır artığraq bulıp çıqqan.

Sınawlardan soñ 60 yıl ütügä qaramastan, Marşall utrawlarında 4 märcan utrawında nurlanış däräcäse xätär yuğarılıqta. Tikşerenüçelär tezmäneñ Bikini dip ataluçı utrawında 1954nçe yılda yasalğan “Kastl Bravo” vodorod bombası sınawınıñ 2nçe Bötendön’ya suğışında Yaponiyägä atılğan bombalardan meñ qat tağın da köçle buluına iğ’tibarnı cälep itä.  Utrawda yäşäwçelär 1946nçı yılda mäcbüri räweştä küçerelgän. 1960nçı yıllarda AQŞ xökümäte cirlekneñ urnaşu öçen imin buluın beldergännän soñ alar tuğan cirlärenä qayta. Ämma ozaqqa tügel. Radiaśiyä däräcäseneñ yuğarı buluı säbäple qabat küçenergä mäcbür bulalar. Soñınnan xalıqnıñ ber öleşe yaman şeş häm radiaśiyä kiterep çığarğan başqa çirlär belän xastalana.    

AQŞ 1946nçı yıldan başlap 1992gä qadär törle urınnarda barlığı 1054 atom-töş sınawı uzdırdı.



Bäyläneşle xäbärlär