Guaydo xökümät wäkilläre belän oçraştı

Venesuêlada oppoziśiyä liderı Xuan Guaydo däwlät başlığı Nikolas Maduro xökümäte belän Norvegiyädä oçraşuların belderde. Bu xaqta ul yazmaça açıqlaw yasadı.

Guaydo, ällä-niçä tapqır baş tartqannan soñ, söyläşü öçen östal artına utıruın qabul itte. Anıñ äytüençä, äñgämä yaña maqsat bilgeläw belän bäyle.  Guaydo delegaśiyäsendä Stalin Gonsales, êlekkege deputatlar Fernando Martinez Mottola häm Xerardo Blayd, texnik kiñäşçe Visente Diaz buluın belderde. Monnan ike atna êlek çıqqan xäbärlärdä dä älege isemnär atalğan ide. Ämma Guaydo ul waqıtta oçraşu turındağı xäbärlärneñ yalğan buluın belderde. Soñınnan isä Norvegiyä xökümäteneñ yaxşı niyäten cawapsız qaldırmaw öçen ber delegaśiyäneñ xökümät belän oçraşuın rasladı.  

Guaydonıñ yazmaça belderüe aldınnan Norvegiyä tarafı räsmi açıqlaw yasap, başqala Osloda Maduro xökümäte häm oppoziśiyäneñ ikençe oçraşu öçen cıyılaçağın xäbär itte.

Guaydo xökümätne bärep töşerü öçen AQŞ häm bik küp kenä Latin Amerikası däwlätlärennän yärdäm ala. Ul uzğan yıl däwlät başlığın saylawda 68% tawış belän ciñgän Maduronı bärep töşerü öçen küpsanlı çaqırular yasadı häm uñışsız xärbi tüntäreleş kereşüen oyıştırdı.