İzrail delegaśiyäseneñ Pol'şağa säfäre ğamäldän çığarıldı

İzraildän Pol’şağa barırğa cıyınğan ber törkem wäqalätle zatnıñ säfäre kire qağıldı. Moña İzrail tarafınnan yasalğan sonğı belderü säbäpçe bula. Bu xaqta Pol’şanıñ tışqı êşlär ministrlığınnan yazmaça açıqlaw yasaldı. Anda İzrail sośial’ tigezlek ministrlığınıñ ğomum mödire Avi Koên-Skali citäkçelegendäge delegaśiyäneñ bügen bulaçaq säfäreneñ ğamäldän çığarıluı äytelä.

“İzrail tarafınıñ sonğı mizgeldä yaqlar arasında bulaçaq oçraşularda iñ başta yähüdlärneñ êlekkege milken kire qaytaru mäs’äläse kütäreläçäge turındağı belderüe säbäple Pol’şa izraille wäkillärneñ säfärennän baş tartu qararı çığardı,”- diyelä açıqlawda.

İzrail tışqı êşlär ministrı İsraêl’ Kaś fevral’ ayında polyaklarnı antisemitizmda ğayeplägännän soñ ike il arasında krizis tudı. İzrail häm Vişegrad törkeme illäreneñ urtaq cıyılışı da, Pol’şanıñ qatnaşmaw qararınnan soñ, ütkärelmiçä qaldı.