Sinagogağa höcüm itüçe Gitlerdan ilham alğan
AQŞta yähüdlärneñ ğıybadätxanäsenä höcüm itüçe şul uq könne internetta yazma belän urtaqlaşqan
AQŞnıñ San-Diyego şähärendä sinagogağa höcüm itüçeneñ uzğan ayda Yaña Zelandiyädä ike mäçetkä terrorçılıq höcüme yasawçıdan ürnäk aluı açıqlandı. Waqıyğa atna axırında buldı. 19 yäş’lek Djon Êrnest sinagogada 1 keşene üterde häm 3 keşene yaraladı. Anıñ şul könne ük internetta urtaqlaşqan yazması iğ’tibarnı cälep itä.
Amerika matbuğatındağı xäbärlärgä qarağanda, Êrnest höcümnän alda internet platformasında üzen “antisemit häm aq rasaçı” dip atıy. Ul yähüdlärne üterü plannarı turında yaza.
Êrnest AQŞnıñ Pitsburg şähärendä oktyabr’ ayında ber sinagogağa höcüm itkän keşe belän uzğan ayda Yaña Zelandiyädä mäçetlärdä keşe ütergän terrorçı häm Adol’f Gitlernı “rol’ modele” bularaq bilgeli. Yazmasında bu şäxeslärneñ üzenä ilham birüen belderä.
Yeget Kaliforniyädä uzğan ay ber mäçetkä ut törtülären dä açıp sala. Soñğı höcümen ul Yaña Zelandiyä terrorçısına bağışlawın assızıqlıy.
Êrnest sinagogağa bärep kerü mizgellären turıdan-turı êfirda kürsätergä telägän. Ämma sośial’ platforma moña röxsät birmägän.
San-Diyego şerife Uil’yam Gor beldergänçä, Êrnest sinagogağa tağın da zur külämle höcüm äzerlägän. Ämma qoralında texnik xilaflıq kilep çığa häm bu qurqınıç faciğağa kirtä bula.
Bäyläneşle xäbärlär
AQŞ Pol'şa belän Niderlandqa raketa cibärä
Awrupa illäre saqlanu mömkinleklären arttıru maqsatınnan AQŞtan qorallar satıp aldı
