Parijnıñ qayğısın urtaqlaşu

Notr-Damnıñ yanuı küplärne teträtte

Parijnıñ qayğısın urtaqlaşu

Franśiyäneñ başqalası Parijda tarixi Notr-Dam kafedralendä çıqqan yanğınnan soñ däwlätlär borçuların häm berdämleklären belderde.

İspaniyä xökümäte räise Pedro Sançes Twitter xisabında bolay dip yazdı: “Notr-Damnıñ yanuı Franśiyä öçen genä tügel, İspaniyä häm Awrupa öçen dä hälakät. Yalqınnar 850 yıllıq tarixi, arxitektur qorılmanı cir belän ber itä. Monı onıtu awır bulaçaq. Franśiyä bu böyek mirasnı qotqaruda bezgä isäp tota ala.”

İtaliyä xökümäte räise Djuzeppe Konte dä Twitter xisabında: “Franśuzlarnıñ, awrupalı härberebezneñ yöräge xäräbägä äwerelde,”-dip yazdı.

Germaniyä kanślerı Angela Merkel’ dä Parijdağı waqıyğalarğa bik borçıluın belderep: “Uylarıbız franśuz duslarıbız belän,”-dide.

Avstriyä ilbaşı Aleksandr Van der Bellen isä Twitterdan belderü yasap: “Parijdan qurqınıç häm teträndergeç küreneşlär. Mähabät Notr-Dam kafedrale yana. Uylarıbız Parij belän bergä,”-dide.

Angliyä xökümäte räise Tereza Mêy yanğın belän köräşüçelärgä teläktäşlegen belderde.

Awrupa Berlege şurası räise Donal’d Task sośial’ media xisabında “Bügen barıbız parijlı” dide.

Awrupa Berlege komissiyäse başlığı Jan-Klod Yunker sośial’ media aşa waqıyğalarnı küzätep baruın belderde. “Nindi şomlı mizgellär. Barlıq franśuz xalqınıñ xislären urtaqlaşam,”-dide ul.

NATO ğomum särqatibe Djens Stoltenberg: “Uylarıbız Awrupanıñ iñ zur simvolın qotqarırğa tırışuçılar häm franśuz xalqı belän,”-dide.

Vatikannan yasalğan belderüdä Notr-Dam kafedralendäge yanğın turındağı xäbärne zur tetränü häm borçu belän qarşılawların äyttelär.

AQŞ ilbaşı Donal’d Tramp: “Parijdağı Notr-Dam kafedralendäge qotoçqıç yanğınnı küzätü awır. Bälki yanğınnı sünderü öçen oçuçı su tankerları qullanıla alır ide. Tiz xäräkät itü kiräk,”-dip yazdı.

İran tışqı êşlär ministrı Zarif Cävad ta Twitterdan belderü yasadı. “Notr-Damnıñ 800 yıl buyı suğışlar häm inqıylabnı kiçkännän soñ öleşçä yuqqa çığuına borçılabız. Uylarıbız franśuzlar häm barlıq katoliklar belän,”-dip yazdı ul.  



Bäyläneşle xäbärlär