Süriyädä yuğalğan Qızıl Xaç xezmätkärläre

Oyışma 2013nçe yılda DEAŞ terrorçı oyışması tarafınnan urlanğan 3 xezmätkären qaytaru öçen tırışa

Süriyädä yuğalğan Qızıl Xaç xezmätkärläre

Xalıqara Kızıl Xaç komitetı Süriyäneñ İdlib töbägendä 2013nçe yılda DEAŞ terrorçı oyışması tarafınnan urlanğan 3 xezmätkären qaytaru öçen möräcäğat’ yasadı. Yaña Zelandiyädän şäfqat’ tutaşı Luiza Akavi, süriyäle şofyerlar Alaa Rajab häm Nabil Bakdones İdlibtäge sälamätlek saqlaw oyışmalarına mediśina kiräk-yaraqları taşuçı konvoyda bula. Alarnı qorallı keşelär tuqtata. Konvoydağı 7 keşene urlıylar, 4se ikençe könne irekkä cibärelä.  

Şäfqat’ tutaşın qotqaru öçen söyläşülär yıllar buyı däwam itä. “İñ sonğı ışanıçlı mäğ’lümatlar buyınça, Akavi 2018nçe yıl axırında äle isän bulğan,”-diyelä Qızıl Xaç komitetı belderüendä.

Süriyäle şofyerlar Rajab belän Bakdonesnıñ yazmışı turında isä berni bilgele tügel.

Möräcäğat’tä Qızıl Xaç komitetı direktorlarınıñ berse Dominik Stillxartnıñ fikerlärenä dä urın birelä. “Sonğı 5 yıl yarım urlanğan 3 xezmätkärebezneñ ğailäläre öçen bik awır ütte. Ägär alar xaman totıqlı bulsa, xäzer ük bernindi şartsız irekkä cibärelülären telibez,”-di ul.  



Bäyläneşle xäbärlär