Yaña Zelandiyädä radio häm televideniye aşa azan äytelde

Comğa namazında xökümät räise qatnaştı

1168536
Yaña Zelandiyädä radio häm televideniye aşa azan äytelde

Yaña Zelandiyädä Kraysçerç şähärendäge ike mäçetkä höcümnän soñğı täwge comğa könne däwlät radiosı häm televideniyese aşa azan äytelde. Şul räweşle, ildä möselmannarğa teläktäşlek kürsättelär. Azannan soñ terrroçılıq qorbannarın 2 minut tın qalıp iskä aldılar.

Äl-Nur häm Linvud mäçetlärendä ğomere özelüçelär öçen Yaña Zelandiyäneñ barlıq şähärlärendä iskä alu çaraları oyıştırıldı.

İlneñ xökümät räise Jasinda Ardern Kraystçerçtäge Xagli Parkta qılınğan comğa namazında qatnaştı. Ğıybadät aldınnan ul qısqaça çığış yasadı. Anda mondıy süzlär bar ide: “Möxämmät päyğambär bolay di: ber-bereñä şäfqat’, märxämät häm qayğırtuçanlıq belän inanuçılar ber gäwdä şikelle. Gäwdäneñ qaysı da bulsa ber cire awırtsa - böten gäwdä monı xis itär. Yaña Zelandiyä sezneñ yanığızda. Matämdä bez bergä.”

Comğağa kilüçelär Jasinda Ardern häm barlıq Yaña Zelandiyä xalqına bu qayğı qarşında yalğız qaldırmawları öçen räxmät äytte. Äl-Nur mäçete imamı Gamal Fouda: “Yaña Zelandiyäneñ ciñelmäs buluın kürsättek. Dön’ya bezdä söyü häm berdämlekneñ ürnägen kürä ala. Yörägebez yaralı, ämma bez ciñelmädek,”-dip söyläde.

İl külämendä ütkän çaralarda bik küp xatın-qız yawlıq yabıp möselmannarğa teläktäşlek kürsätte.

 



Bäyläneşle xäbärlär