Niderlandta qorallı höcüm

Bilgesez keşe tramvay êçendäge keşelärgä ut aça

Niderlandta qorallı höcüm

Niderlandnıñ Utrext şähärendä bulğan qorallı höcümdä, berençel mäğ’lümatlar buyınça, 1 keşe ülde, 6sı yaralandı. Höcüm itüçe tramvayğa menä dä uñğa-sulğa ata başlıy, soñınnan qaça.

Poliśiyä häm terrorçılıq belän köräş bülege cirlektä operaśiyä başladı. Rayon 3 boralaq belän hawadan küzätelä.

Poliśiyä wäkilläre waqıyğanıñ terrorçılıq höcüme bulu farazın citkerügä, xökümät räise Mark Rutte ministrlar kabinetın aşığıç räweştä cıydı. Ul waqıyğanı bik borçu tudıruçı bularaq bäyäläde.

Niderlandnıñ terrorçılıqqa qarşı köräş bülege höcümnän soñ “krizis östäle” oyıştırdı.  

Poliśiyä waqıyğa bulğan mäydannı iminlek qırşawı êçenä aldı. Xökümät Utrext şähärendä terror afäte söränen iñ yuğarı däräcägä citkerde.

Poliśiyä barlıq uqu yortları idarälärenä işeklärne bikläw kürsätmäse birde. Parlament häm xökümät yortı binaları tiräsendä yuğarı iminlek çaraları kürelde. İl külämendä dä qurqınıçsızlıq arttırıldı.  

Poliśiyä Yaña Zelandiyädä uzğan atnada bulğan höcümnärdän soñ bigräk tä mäçetlär tiräsendä iminlek çaralarına zur iğ’tibar birde.

Cirle media xäbär itkänçä, höcümçe kerep qaçqan dip farazlanuçı ber binanı terrorçılıq belän köräş bülege törkemnäre äyländerep alğan.



Bäyläneşle xäbärlär