Yaña Zelandiyädä mäçettä qanlı waqıyğa

Kraystçerç şähärendä mäçettä comğa namazı qıluçılarğa qorallı höcüm buldı

1163829
Yaña Zelandiyädä mäçettä qanlı waqıyğa

Yaña Zelandiyäneñ Kraystçerç şähärendä 2 mäçettä comğa namazı qıluçılarğa qorallı höcüm buldı. Anda bik küp keşeneñ ülüen xäbär itälär.  Höcümçelärneñ berse namazdağı keşelärgä ut açu mizgellären sośial’ media aşa turıdan-turı êfirda kürsätep barğan.

Qanlı waqıyğa waqıtında ğıybadät yortında 200 keşeneñ buluı bilgele. Höcüm belän bäyle 4 keşe saq astına alındı. Alarnın öçese ir-at, berse - xatın-qız.

Xökümät räise Jasinda Ardern: “Bügen ilebezdäge iñ qarañğı könnärneñ berse,”-dide. Ul bu qurqınıç cinayät'tä 40 keşeneñ ğomere özelüen, 48 keşeneñ yaralanuın, alarnıñ 20seneñ xäle awır buluın belderde. Soñınnan iminlek idaräsennän ülüçelärneñ sanınıñ 49ğa citüen xäbär ittelär.

Cirle matbuğat çaralarında çıqqan xäbärlärgä qarağanda, Len Penexa isemle şahit qaradan kiyengän keşeneñ Äl-Nur mäçetenä kerüen häm ğıybadät qıluçılarğa ut açuın, şunnan soñ êçtä ığı-zığı başlanuın, mäçettägelärgä yärdäm itü öçen kergän arada “här urında ülgän keşelär” kürüen belderde.

Höcümnän soñ rayonda uqu yortlarında yal iğ’lan itelde. Xalıqqa mäçetlärdän yıraq torırğa quşıldı, ğıybadät yortlarında işeklärne yabu kürsätmäse birelde.



Bäyläneşle xäbärlär