Venesuêlada öçençe kön ut yuq

Venesuêlada utlar comğa könne kiçke säğat’lärdä betkän ide

1161246
Venesuêlada öçençe kön ut yuq

Venesuêlada 3nçe kön êlektr ênergiyäse yuq. Şul säbäple barlıq belem birü yortlarında yal iğ’lan itelde. Däwlät dairäläre dä xezmät birmäyäçäk.

Tarixındağı iñ citdi säyäsi krizista bulğan Venesuêlada utlar comğa könne kiçke säğat’lärdä betkän ide. İlne tulısınça qarañğılıq êçendä qaldırğan êlektr ênergiyäsendäge özeklek, başqala Karakastağı öleşçä tözätülär tışında, däwam itä.  

Xökümät fikerençä, utlar gidroêlektr stanśiyäse Guridäge sabotaj näticäsendä bette. Wäzğıyät’ne tözätü öçen xäzer êşçänlek alıp barıla.

Däwlät başlığının êlemtä, mädäniyät häm turizm öçen cawaplı kiñäşçese Xorxe Rodriges başlanğış mäktäptän başlap universitetqa qadär barlıq belem birü yortlarında yal iğ’lan itelüen, monnan tış, fabrika häm säwdä üzäkläreneñ dä êşlämäwen belderde.  Ul ildäge êlemtä häm internetta da problemalar kiterep çığarğan krizisnı ciñäçäklären söyläde.  

Venesuêlılar telefon signalı totqan urınnarda säğat’lärçä kötä. Şulay uq, yağulıq stanśiyälärendä dä ozın çiratlar barlıqqa kilde.

Bik küp cirleklärdä ütkärgeçlärdän su täêmin itelmi. Karakasta watandaşlar park häm baqçalardağı çığanaqlardan öylärenä su taşıy.

Karakasnıñ Baruta rayonında isä ber säwdä üzägendäge kibetne yäş’lär törkeme basa. Cirle matbuğat çaralarındağı xäbärlärgä qarağanda, azıq-tölek urlaw oçrağınnan soñ poliśiyä 50dän artıq keşene êläkterde.  

Üzen waqıtlıça däwlät başlığı dip iğ’lan itkän Xuan Guaydo êlektr ênergiyäsendäge özeklek belän bäyle matbuğat kiñäşmäse uzdırdı. Ul parlamentta ildä ğadättän tış xäl iğlan itü turında söyläşäçägen belderde.

Oppoziśiyä deputatı Xose Manuêl Olivares sośial’ media xisabınnan belderü yasap, 18 keşeneñ, şul isäptän yaña tuğan ber bäbäyneñ dä, êlektr ênergiyäse bulmaw arqasında xastaxanälärdä ülüen alğa sörde.

İlneñ sälamätlek saqlaw ministrı Karlos Alvarado isä ut bulmaw näticäsendä keşelär ülüe turındağı xäbärlärne kire qaqtı. Ul xastaxanälärneñ kübesendä generatorlarnıñ êşläwen häm bu mäs’äläneñ ministrlıq öçen başta kilüen äytte.

 



Bäyläneşle xäbärlär