Podvalda - faşizm muzeye

Avstriyädä öyeneñ podvalında Gitler byustı, svastika şikelle faşistlarnıñ simvolların kürgäzmägä quyğan keşene xökem ittelär. Aña 13 ay törmä cäzası häm 1200 yevro ştraf tülätü qararı birelde.

Avstriyä däwlät telekanalı xäbärenä qarağanda, Klagenfurt şähärendä yäşäwçe 75 yäş’lek keşe yaqınça 50 yıl buyı älege podval-muzey öçen êksponatlar cıyğan. Anda faşist ğaskärläreneñ törledän-törle suğış kiräk-yaraqları da bar. Mäxkämä älege şäxesne naśizm propagandası yasawda ğayepläde. Anıñ ğamälläre faşizm qaraşlarınıñ qabat cäyelüen tıyuçı qanunğa qarşı kilä dip tabıldı.

İseme äytelmägän şäxes tarix häm suğış äyberläre belän qızıqsınuın, şul säbäple alarnı cıyuın belderep aqlandı. Ul faşizm qaraşların yaqlamawın alğa sörde.    

Muzeydağı äyberlärne cıyıştırğan poliśiyä xezmätkärläre moña qadär bu xätle zur faşist kollekśiyäsen kürmäwlären söyli.