"Demonstraśiyälärdä qatnaşuçılar - iñ naçar cinayät’tä urtaq"
Êmmanuêl’ Makron härkemne sarı jiletlılarnı tänqıyt'lärgä çaqırdı
“Köç qullanılğan çaralarğa baruçılarnıñ iñ naçar cinayät’tä urtaq buluların äytergä kiräk”. Franśiyä ilbaşı Êmmanuêl’ Makron sarı jiletlılarnıñ demonstraśiyäläre turında şulay dide. Ul Yelisey Sarayında rizasızlıq çaraları arqasında kilep çıqqan problemalarnı çişü nisbätennän xakimiyät başlıqları belän uzğan cıyılışta çığış yasadı.
Makron rizasızlıq çaraların tıyunıñ xoquqıy yaqtan mömkin bulmawın, ämma härkemneñ andağı köç qullanu ğamällärenä qarşı çığuı kiräklegen belderde.
Awrupa şurası keşe xoquqları komissarı Dun’ya Miyatoviç Franśiyädä sarı jiletlılarnıñ çaralarında keşe xoquqlarına tağın da ixtiramlı bulırğa, tınıç demonstraśiyälär iregenä çiktän tış qısular kitermäskä häm küz yäşe çığaruçı gaz qullanunı tıyarğa çaqırğan ide.
Sarı jiletlılarnıñ rizasızlıq çaraları 2018nçe yılnıñ 17nçe noyabrennän birle däwam itä. Ul sıyıq yağulıqqa bäyä artu häm naçar iq’tisadi şartlarğa reakśiyä bularaq başlandı, soñınnan Makron idaräsenä qarşılıqqa äwerelde.
Çaralarda älegä qadär 11 keşeneñ ğomere özelde, 2 meñnän artıq keşe yaralandı, 8 meñ 400 keşe saq astına alındı häm 1796 keşe iregennän mäxrüm itelde.
