Awrupa Berlege Maduroğa kisätü yasadı
Venesuêlada qabat ilbaşı saylawları uzdıru turında iğ'lan itärgä çaqırdılar
Awrupa Berlege yaqındağı könnärdä Venesuêlada yaña ilbaşı saylawları ütkärelü turında iğ’lan itelmäsä, Milli parlament räise Xuan Guaydonı waqıtlıça däwlät başlığı bularaq tanıyacağın xäbär itte.
Bu xaqta Tışqı mönäsäbätlär häm iminlek säyäsäte yuğarı wäkile Federika Mogerini yazmaça belderü yasadı. Ul Venesuêlada saylawlarnı könstituśion tärtipkä häm xalıqara demokratik standartlarğa turı kilüçe irekle, açıq häm ışanıçlı räweştä ütkärergä çaqırdı. Mogerini uzğan yıl may ayında ilbaşı öçen tawış birüneñ ğadel uzmawın äytte. Ul ildä xalıqnıñ ixtiyarın wäkillek itüçe xökümätkä ixtiyac barlığın assızıqlıy.
Venesuêla töp qanunınıñ 233nçe maddäsendä bäyan itelgänçä, ilbaşı üz wazıyfasın däwamlı bularaq cirenä citkerä almıy torğan xälgä kilsä, Milli parlament räise däwlät başlığı wazıyfasın 30 kön başqara ala.
Bilgele bulğança, Venesuêlada oppoziśiyä häm xakimiyät taraflılar oyıştırğan mitinglardan soñ Milli parlament räise Xuan Guaydo üzen waqıtlıça däwlät başlığı iğ’lan itte. Anı AQŞ, Kanada, Kolumbiyä häm başqa Latin Amerikası illäre yaqlap çıqtı.
Törkiyä, Meksika, Rusiyä, Qıtay häm Boliviyä isä Nikolas Maduro xökümätemä teläktäşlek belderde.
