Kamerunda keşe urlaw

Kamerunnıñ Anglofon töbägendä 36 keşene urladılar. Cirle matbuğat çaralarındağı xäbärlärgä qarağanda, alar 2 avtobusqa utırıp ber toraq punkttan ikençesenä baru öçen yulğa çıqqan bulğan. Transportlarnı qorallı keşelär tuqtata. Yulbasarlar avtobustağılarnı urmanğa alıp kerep kitä. Ämma texnikağa timilär.

Töbäkkä iminlek köçläre cibärelde.   

Kamerunda xökümät 2016nçı yılda inglizçä söyläşüçe anglofon töbägendäge mäktäplär häm mäxkämälärgä inglizçä belmäwçe uqıtuçılar häm sud’yalar cibärde. Şunnan soñ cirlektä rizasızlıq çaraları başlandı.

Separatistlar 2017nçe yılnıñ 1nçe oktyabrendä Sisiki Ayuk Tabe citäkçelegendä Kumbo şähärendä Ambazoniya däwläte tözülären iğ’lan itte. Tabenı xalıqara êzläwgä birdelär. Anı ğıynvar ayında Nigeriyada êläkterdelär häm Kamerunğa tapşırdılar.  

Armiyä belän separatistlar arasında çıqqan bäreleşlärdä 2016nçı yılnıñ oktyabrennän başlap kimendä 200 iminlek saqçısı häm 600 ğadi keşeneñ ğomere özelde.