Xalıq ışanıçlısı - keşe qaçaqçısı

Bel’giyäneñ Mexelen şähärendä çiktän tış uñçı partiyä Yaña Flamand ittifağınıñ muniśipal’ qanun çığaru organı äğ’zasın keşe qaçaqçılığında ğayepläp qulğa aldılar. Prokuraturadan yasalğan belderügä qarağanda, Melikan Kucam isemle älege xalıq ışanıçlısı, monnan tış, oyışqan cinayät’çelek, rişwätçelek häm qanunsız aqça cıyuda şöbhälänelä.

Kucamnıñ Bel’giyädäge süryani xalqı cämäğat’çelege belän êlemtäläre bar. Anıñ Süriyä häm Ğıyraqtağı xristiannarğa “gumanitar viza” birgändä qanun bozuı alğa sörelä. Älege dokument ğadättä 350 yevro tora. Kucam 2 meñnän başlap 10 meñ yevroğa qadär aqça alğan dip farazlana.  

Qulğa aludan soñ Yaña Flamand ittifağınnan Melikan Kucamnıñ partiyä belän mönäsäbätläre tuqtatıluın belderdelär. Firkaneñ êlekkege möhacirlär häm migraśiyä ministrı Teo Franken bu xäbärlärne işetkäç aptıraşqa qaluın häm qayğıruın söyläde.

Bel’giyä 2015nçe yıldan birle suğış baruçı töbäklärdäge xristiannarnıñ ilgä sıyınuın “gumanitar viza”lar belän ciñeläytä.