Gabonda tüntäreleş bulmıyça qaldı

İrtänge säğat’lärdä tüntäreleş yasarğa mataşqan xärbilär qulğa alındı

1120645
Gabonda tüntäreleş bulmıyça qaldı

Gabonda irtänge säğat’lärdä tüntäreleş yasarğa mataşqan xärbilär qulğa alındı.

Gabon xökümäte süzçese häm êlemtä ministrı Gay-Bertran Mapangu däwlät radiosına bärep kerep belderü yasağan fetnäçelärneñ jandarmeriya tarafınnan qulğa alınuın xäbär itte. Ul wäzğıyät’neñ kontrol’ astına alınuın häm berniçä säğat’ êçendä här närsäneñ êlekkege xälenä kire qaytaçağın äytte.

İrtänge säğat’ 4 tulıp 30 minutta däwlät radiosın qulğa töşergän qayber xärbilär, belderü yasap, Milli kiñäşmä şurası töziyäçäklären xäbär itkän ide. Leytenant Kelli Ondo Obiang citäkçelegendäge fetnäçelär üzlären “Saqlanu häm İminlek köçläreneñ patriotik frontı” dip atıy. Alar belderüdä Marokkoda däwalanuçı ilbaşı Ali Bongonıñ yılbaşı möräcäğateneñ ömetsezlek tudıruın, anıñ wazıyfasın cirenä citkerä almayacağın kürsätüen assızıqlıy.

Bongo Soğud Ğaräbstanında oyıştırılğan “Kiläçäkkä investiśiyä” konferenśiyäsenä kitkän cirennän 24nçe oktyabr’dä Riyadta xäle naçarayıp xastaxanägä kerde. Anıñ paraliçlanuı, operaśiyä yasaluı bilgele buldı. Soñınnan Gabon ilbaşın yasalma komağa kertkännär. Bongo, beraz ternäklängännän soñ, Marokko patşası 6nçı Möxämmätneñ çaqıruı buyınça älege ildä däwalanu kursı ütärgä kitte. Rabattağı xastaxanädän ul 6nçı dekabr’dä çıqtı häm älegä qadär şunda. Yaña yıl möräcäğaten dä ilbaşı Marokkodan yasadı. Videoda anıñ uñ qulın xäräkätländerä almawı kürende. “Kürep torasız - xälem yaxşıra häm tizdän sezneñ belän oçraşırğa xäzerlänäm,”-dide ul möräcäğatendä.



Bäyläneşle xäbärlär