AQŞ çigendä tağın ber bala ülde
Ul 7 meñ keşelek qaçaqlar konvoyı belän bäxet êzläp kilgän bulğan
Meksikadan Amerikağa qanunsız yullar belän kergän häm çik buyında qulğa alınğan 8 yäş’lek ir bala ülde. Ul ğailäse belän Gvatemaladan kilgän bulğan.
AQŞ tamğaxanä häm çik sağı bülegennän yasalğan belderügä qarağanda, balanı N’yu-Meksiko ştatındağı Alamogordo töbägendä kiçä irtän xastaxanägä salğannar. Aña suıq tiyü häm yuğarı temperatura diagnozın quyğannar da daru birep çığarğannar. Kön däwamında balanı künel bolğanu häm qosu şikayäte belän qabat xastaxanägä salalar, berazdan anıñ yöräge tibüdän tuqtıy.
Uzğan atnada gvatemalalı 7 yäşendäge qız balanıñ da saq astında ğomere özelde. Çik buyı saqçıları keçkenä qızçıqnıñ könnär buyı aç häm susız qaluın belderde.
Üzäk Amerikadan AQŞqa kerü öçen yulğa çıqqan 7 meñnän artıq keşelek konvoy uzğan ayda Meksikanıñ çik buyı şähäre Tixuanağa kilde.
Gvatemala, Gonduras häm Sal’vadordan xäyerçelek, dähşät häm zolım säbäple qaçuların söyläwçe qaçaqlarnıñ kübeseneñ maqsatı, saq astına alu turındağı kisätülärgä qaramastan, teläsä-nindi yullar belän AQŞqa kerü.
