İndoneziyädä qabat śunami kisätüe

İndoneziyäneñ Sumatra häm Yava utrawları arasında urın alğan Zond buğazında tağın ber śunami ixtimalı turında kisätü yasaldı. Anak Krakataw yanartawındağı şartlawlar häm kütärelgän dulqınnar şundıy qurqınıç tudıra.

Yanartawdağı şartlaw tawışları yar buyı töbäklärendä işetelep tora. Wäqalätle zatlar xalıqnı yar buyı sızığınnan yıraqlaşırğa häm êzläw-qotqaru törkemnären cirlektän kitep torırğa çaqırdı.

Keşe bik küp ülgän töbäktäge yal itü urınnarına jurnalistlarnıñ kerüenä röxsät birelmäde. Xäzer annan qotqaru êşläre alıp baruçı xärbi berleklär häm grajdanlı qotqaruçılar da kitä başladı.

Şimbä könne bulğan śunamida älegä qadär 373 keşeneñ ülüe bilgele. 1459 keşe yaralı. 128 keşe isä yuqqa çığuçılar isemlegendä.

Belgeçlär, tikşerenülär ütkärgännän soñ, śunamiğa Anak Krakatawdağı şartlaw waqıtında zur kisäkneñ qubuı säbäpçe bulğan diğän näticä yasadı.

Äle bıyılnıñ 28nçe sentyabrendä genä İndoneziyäneñ Sulawesi utrawında bulğan 7,5 zurlığındağı cir teträw häm śunamida 2 meñnän artıq keşeneñ ğomere özelde, 1500gä yaqını yuqqa çıqtı.

İndoneziyä “Tın okean ut qırşawı” dip ataluçı cir teträw häm vulkannar sızığında urnaşqan. Anda kerüçe berniçä ildä 2004nçe yılnıñ 26nçı dekabrendä 9,1 zurlığında cir teträw häm śunami buldı. Qotoçqıç afät 230 meñ keşeneñ ğomeren alıp kitte.