İndoneziyädä śunami

Qotoçqıç qazada ülüçelär häm yaralanuçılar küp

1111850
İndoneziyädä śunami
endonezya tsunami2.jpg
endonezya tsunami1.jpg

İndoneziyäneñ Sumatra häm Yava utrawları arasındağı Zond buğazında bulğan śunamida 168 keşe ülde, 745e yaralandı.

İlneñ afätlär waqıtında idarä itü ağentlığı süzçese Sutopo Purwo Nugroxo beldergänçä, tağın 20läp keşe yuqqa çıqqan. Śunami iñ köçle täêsir itkän cirlek - Pandenglang töbäge.  Anda 430 öy häm 9 qunaqxanä, monnan tış, 10 köymäneñ zarar kürüe turında mäğ’lümat bar.

Śunami barlıqqa kilügä Anak Krakataw yanartawındağı soñğı şartlawlar säbäpçe bulğan dip farazlana.  

İndoneziyä meteorologiyä, klimat häm geofizika oyışması isä xalıqnı buğaz tiräsendäge yar buyı sızığınnan yıraq torırğa çaqırdı.

Cirle mediada Anaq Krakataw yanartawı şartlawınnan soñ yaña ay tuu säbäple sularnıñ kütärelep yañadan kimüe häm su astındağı cirneñ şuışuı śunamiğa êtärgeç bulğandır dip farazlana.  

Tabiğıy qaza bulğan cirleklärdä kiñ külämle êzläw-qotqaru êşläre däwam itä. Plyaj sızığındağı bik küp turistik urınnarnıñ śunami yoğıntısı astında qaluı säbäple ülüçelärneñ sanı artaçağınnan qurqalar.

Äle 28nçe sentyabr’dä genä Sulawesi utrawında bulğan cir teträw häm annan soñ barlıqqa kilgän śunamida 2 meñnän artıq keşeneñ ğomere özelde, 1500gä yaqını yuqqa çıqtı.



Bäyläneşle xäbärlär