AQŞta rasaçıl höcüm

Amerika Quşma Ştatlarınıñ Pitsburg şähärendäge ber liśeynıñ tualetında rasaçıl höcümgä duçar bulğan süriyäle Şäymanı xastaxanägä saldılar. 15 yäş’lek qız häm ğailäse Süriyädäge watandaşlar suğışınnan qaçıp 2 yıl yarım êlek biregä kilep urnaşqan. Şäyma şähärdäge liśeylarnıñ bersendä belem ala başlıy. Comğa könne ul uqu yortındağı tualetta rasaçıl höcümgä duçar bula. Anda ber törkem qızlar êlektron tämäke tarta. Aradan berse Şäymanı tışqa qua. Süriyäle qız baş tartqannan soñ ul anı cirgä yığıp yodrıqları belän töyä başlıy. Bu waqıtta tualetta bulğan başqa uquçılar älege waqıyğanı töşerep sośial’ mediada urtaqlaşa.

Waqıyğa internetta taralğannan soñ liśeyda uquçılar häm başqalar Şäymağa teläktäşlek belderä. Höcümçe 3 köngä uqudan çitläşterelä.

Şul uq waqıtta, waqıyğanıñ AQŞtağı ähämiyätle möselman berläşmäse Amerika-islam mönäsäbätläre şurasına barıp ireşüe häm alarnıñ mäs’äläne federal’ prokuraturağa belderäçäkläre açıqlandı.