Ğaläm turizm korabı sınawın ütte
Ğalämgä oçarğa teläwçelär inde xäzerdän ük çiratqa basqan
Amerikanıñ Virjin Galaktik şirkäte tarafınnan kiçä oçırtılğan ğaläm turizm korabı sınaw oçışın uñışlı başqarıp Cirgä äylänep qayttı. Oyışma, şulay itep, kliyentların ğalämgä cibärü niyätenä tağın ber adımğa yaqınlaştı.
Ğaläm turizmı korabı Los - Anjelesqa yaqınça 145 kilometr yıraqlıqtağı Moxavê çülennän irtänge säğat’ 7dä oçırtıldı.
Angliyä milliarderı häm Virjin Grupnı tözüçe Riçard Bransonnıñ şirkäte ğadäti turistlarğa orbitada oçışlar täq’dim itärgä planlaştıra.
Virjin Galaktik belän ğaläm yulçılığına çığu öçen inde xäzer ük 600 keşe üzenä urın alıp quyğan. Alar arasında mäşhür aktyer Leonardo DiKaprio häm pop cırçı Djastin Biber dä bar. 90 minutlıq oçışnıñ bäyäse isä 250 meñ dollar.
Virjin Galaktik turistlarnı ğaläm çigenä çığarıp alarğa berniçä minut buyınça cirneñ tartu köçe bulmağan şartlarnı sınap qaraw mömkinlege birergä uylıy.
