Xusilär Xudäydädän çigenergä rizalaştı

Şveśiyädäge Yämän söyläşülärendä qatnaşqan Xusi delegaśiyäse taraflarnıñ Xudäydädän çigenüen qabul itte. Alarnıñ ber äğ’zası Cämal Amir: “Berläşkän Millätlär komitetı qul astında barlıq taraflarnıñ Xudäydä şähärennän çigenüen, kiñ külämle häm aşığıç räweştä “utnı tuqtatu” ğamälgä aşırıluın xupladıq,”-dide.

Amir beldergänçä, Xusi delegaśiyäse BMOnıñ Xudäydä häm başqa portlarnı kontrol’dä totuın qabul itkän. Şähärdäge idaräneñ 2014nçe yıl sentyabrenä qadärge xälenä kire qaytuına kilgändä, Cämal Amir kileşüdä bu xaqta süz bulmawın äytte. Anıñ fikerençä, Taiz şähärendäge qamalışnı beterü mäs’äläse, möğayen, kiläse söyläşülärdä bulaçaq. “Bezneñ delegaśiyä kileşüne xuplawğa qaramastan, Riyad delegaśiyäse (Yämän xökümäte) monı qabul itmäde,”-dide ul.  

Amir äytüençä, alar kiñ külämle “utnı tuqtatu”, kiçü noqtaların açu häm solıx adımnarın yasaw mäs’äläsendä kileşkän. Ämma qarşı yaq barı tik kiçü noqtaların açu häm minalarnı cıyu tarafında. “Xökümät kiñ külämle utnı tuqtatu qararın qabul itmäde,-di ul. - İke taraf arasında aêroportlarnı açu häm Ğomum aviaśiyä idaräsen yañadan êşlätep cibärü mäs’älälsendä kileşü tamamlandı. Anıñ nigezendä barlıq Yämän aêroportları BMOnıñ texnik küzätüenä bireläçäk”.

 Cämal Amir BMO täq’dim itkän barlıq kileşülärneñ xökümät tarafınnan kire qağıluın, xalıqara cämäğat’çelek häm BMOnıñ Yämän maxsus wäkile Martin Griffitsnıñ dokumentnı imzalatu öçen basım yasawnı däwam itüen dä söyläde.

BMO Şveśyädä yämänle taraflarğa Xudäydä, Taiz, Üzäk bank häm Sana aêroportı belän bäyle mäs’älälärne çişü öçen kileşü proyektları täq’dim itte. Monnan tış 16 meñ äsirne almaştıru xaqında söyläştelär. Bu ğamälneñ Xalıqara Qızıl Xaç komissiyäse aradaşçılığı belän 20nçe ğıynvarda tormışqa aşırıluı kötelä.