Êlekkege xärbigä - 5130 yıl törmä

Anı küpläp üterüdä ğayeplilär

1092901
Êlekkege xärbigä - 5130 yıl törmä

Gvatemalada 1982nçe yıldağı grajdannar suğışı çorında yaqınça 200 keşene küpläp üterüdä qatnaşqan êlekkege xärbi 5 meñ 130 yıl törmä cäzasına xökem itelde. Ul 66 yäş’lek Santos Lopez Alonzo.

Ber törkem xärbi 1982nçe yılnıñ dekabrendä Las Dos Êrres awılına bärep kerä. Alar xatın-qızlarnı köçli, awıl keşelären kuvalda belän bärep üterep gäwdälären qoyığa ata. Alonzo da alar arasında bula. Ul, östäwenä, ğailäse üterelgän 5 yäş’lek malaynı urlıy häm ullıqqa ala.

Gvatemalada älege üterülärgä AQŞ yärdämendäge armiyäne cawaplı itep kürälär. Bik küp xärbine saq astına alu ämere çığarıla. Alonzo Gvatemala armiyäsendä xezmät itkän häm küpläp üterülärdä ğayeplängän 3 iptäşe belän bergä Amerikağa qaça. Alarnı anda kilügä ük qulğa alalar. Älege xärbilärneñ ikese äle haman AQŞ törmälärendä. Alonzonı 2016nçı yılda Gvatemalağa tapşıralar. Anıñ belän bergä ilenä qaytarılğan ikençe xärbine dä 6 meñ yılğa räşätkä artına xökem itälär.

BMO mäğ’lümatlarına qarağanda, Gvatemalada 1960nçı yıldan 1996nçı yılğa qadär watandaşlar suğışında 200 meñ keşe üterelde, awıllar yuq itelde häm yözlärçä keşe yuqqa çıqtı. Üterelüçelärneñ kübese cirle mayya indeyeśları.

Gvatemalada 1982nçe yılda tüntäreleş belän xakimiyätkä kilgän häm 17 ay anda qalğan diktatör Êfrain Rios Montt yaqınça 1700 mayya keşesen üterüedä ğayeplänep 80 yıl törmägä xökem itelde. Xäzer anıñ êşen qabat qararğa cıyınalar.



Bäyläneşle xäbärlär