İndoneziyädäge qazada ülüçelärneñ gäwdälären êzläw däwam itä

İndoneziyada kütärelgännän soñ sanawlı minutlar ütügä qazağa oçrağan oçqıçta bulğan yulçılardan 52seneñ şäxes tanıqlığı tabıldı. Alarnıñ 18e xatın-qız häm 34e ir-atnıqı. Bu xaqta Milli êzläw häm qotqaru oyışmasının xäräkät citäkçese urınbasarı Nugroho Budi Viryanto belderde.

Qaza bulğan cirlektä kiçä kiç tağın 13 gäwdäneñ qaldıqların tapqannar. Waqıyğanıñ berençe könennän başlap barlığı 37 cäsäd qapçığı xastanägä iltelgän. Alarnıñ êçendä keşe gäwdäse kisäkläre, şäxsi äyberlär häm oçqıç öleşläre bar.

Ğailä yaqınnarınnan alınğan mäğ’lümat häm DNK ürnäkläre belän mäyetlärneñ kemleklären açıqlarğa tırışalar. Gäwdälärneñ kisäklärgä ayırılğan buluı arqasında älegä tabılğan cäsädlärneñ tögäl sanın äytä almıylar.

Qotqaruçılar töbäktä êzläw êşlären däwam itä. Oçqıçnıñ korpusınıñ ber öleşe tabılğan. Qara ärcädän berençe signallar alınuın belderälär.

Lion hawa yulları Boeing 737 MAX 8 oçqıçı Djakartadan Sumatra utrawına oçışlıy radardan yuğaldı. Anıñ diñgezgä kilep töşüe açıqlandı. Qazanıñ säbäbe xäzergä bilgele tügel. Oçqıçta 181 yulçı häm 8 keşelek êkipaj bar ide. Älegä qadär isän qaluçı tabılmadı.