Skripal’ne ağulawda ğayeplänüçelärneñ cawabı
Ruslan Boşirov häm Aleksandr Petrov GRUda êşlämäwlären belderde

Angliyädä ikele agent Sergey Skripal’ häm qızı Yuliyanı ağulawda ğayeplängän Rusiyä watandaşları Ruslan Boşirov häm Aleksandr Petrov waqıyğa bulğan könnärdä Solsberigä turistik maqsat belän kilülären belderde. Alar bu xaqta Russia Today kanalına söyläde. Boşirov häm Petrov duslarınıñ täq’dime belän turistik Solsberi şähärenä baruların, ämma anda 1 säğat’tän artıq qalmawların häm säyäxätläre waqıtında Skripal’neñ öye yanınnan ütkän bula aluların äytte. Alar sportçılarnıñ tuqlanu rizıqların alıp satu belän şöğıl’länülären häm Rusiyä xärbi küzläw xezmätendä êşlämäwlären citkerde.
Êlekkege rus şımçısı Skripal’ häm qızı Yuliya 4nçe martta Angliyäneñ Solsberi şähärendä Sovetlar Berlege çorında çığarılğan Noviçok dip ataluçı ximik matdä belän ağulandı. Soñraq, iyül’ ayında isä, Êymsberi şähärendä tağın ike Angliyä watandaşı şul uq matdä belän ağulanğan ide.
Angliyä poliśiyäse Skripal’ waqıyğasınıñ şöbhäleläre bularaq Boşirov häm Petrovnıñ fotoların häm isemnären xalıqqa citkerde. Şunnan soñ prem’yer-ministr Tereza Mêy: “Hökümätebez poliśiyä açıqlağan bu 2 keşe Rusiyä xärbi küzläw xezmäte GRU öçen êşli digän näticägä kilde,”-dip belderde.