732 yök maşinası yulda qaldı

Nigerda tovar taşuçı 732 yök maşinası ike däwlätne ber-bersenä totaştıruçı küperneñ zarar kürüe säbäple Beninnan çığa almıyça qaldı.

Cirle matbuğat xäbärlärenä qarağanda, Niger yılğası östennän uzuçı küper ğadättän tış köçle yañğırlar säbäple uzğan atnada cimerelä başlağan. Nigerğa säwdä tovarları taşuçı yök maşinaları ber atna Beninda kötä. Alarnıñ arbalarında azıq-tölek, könküreş ximiyäse häm tözeleş kiräk-yaraqları. Räsmi zatlar fikerençä, yaqındağı könnärdä bu 732 maşina yulğa çıqmasa, ildä qayber tör tovarlarğa qıtlıq tuarğa mömkin.   

Benin wäkilläre yaña küper tözelgängä qadär yök maşinalarına Nigeriya aşa ütärgä kiñäş itä. Ämma monıñ öçen 3 däwlätneñ kileşüe kiräk. Monnan tış, Nigeriya aşa uzğanda yök maşinaların ozata baruçı bulırğa tiyeş.

Niger dön’yanıñ iñ fäqıyr’ illärennän sanala.  Diñgez buyında urnaşqan däwlätlär belän anıñ salım taşlamaları östenlekle säwdä kileşüe bar. Niger, şunıñ yärdämendä, qullanuçı tovarlarınıñ kübesen çittän kertä.  Alarnı ilgä iñ yaqın port - Beninnıñ Kotonu portınnan yök maşinaları belän taşıylar.