İzrail “Azatlıq köymäläre”n sataçaq

İzrail Awrupanıñ törle illärennän qamalıştağı Ğazzägä azatlıq dawlap yulğa çıqqan häm Urta diñgezdä qulğa alınğan köymälärne satarğa cıyına. Bu xaqta cirle gazetlar xäbär itä. Anda yazılğança, Ğazzä qamalışın özü maqsatı belän kilgän häm İzrail diñgez quätläre tarafınnan qulğa töşerelgän 4 köymä satuğa çığarıla. Annan kilgän aqçalar isä Yordannıñ basıp alınğan könbatış yarında yähüd cirläşüçelärdän 2 ğailägä bireläçäk. Alarnıñ tuğannarı fälästinlelär tarafınnan oyıştırılğan çaralarda üterelgän bulğan. Ğailälär Qudüs Märkäz mäxkämäsendä däğ’wa açıp, anı qazanğan. Alarğa Xamas qullanılışına küçärgä tiyeşle köymälärneñ satışınnan kilgän aqçanı birergä bulğannar. Ğailälär bu qararnıñ prinśipial’ bularaq ähämiyätle ikänen assızıqlıy.

Köymälär aykśionda satılaçaq. Alarnıñ bäyäse berniçä meñ İzrail aqçası - şäkäldän artmayacağın belderälär.  

İzrail diñgez quätläre soñğı berniçä atnada awrupalı aktivistlarnıñ Ğazzä qamalışın özü maqsatı belän yulğa çıqqan köymälären qulğa töşerep Aşdod portına kiterde.